Claude Monet

Dr Claude Monet [klod mɔnɛ] (* 14. Novämber 1840 z Bariis; † 5. Dezämber 1926 z Giverny, uf d Wält cho as Oscar-Claude Monet) isch e franzöösische Mooler gsi, wo die middleri Schaffensperiode von em zur Stilrichdig vom Impressionismus zelt wird. Sis Früewärk bis zur Middi vo de 1860er-Joor umfasst realistische Bilder, vo dene het dr Monet e baar im Pariser Salon chönne usstelle. Am Ändi vo de 1860er-Joor het er aagfange afo impressionistischi Bilder zu moole. E Bischbil für d Bilder us dere Faase isch d Hafenaasicht vo Le Havre Impression, Sunnenufgang, wo dr ganze Beweegig dr Naame gee het. Won er nüme em Gschmack vom dr Zit, wo vo de dradizionelle Kunstakademie brägt worden isch, entsproche het, het sich sini finanzielli Laag verschlächteret. In de 1870er-Joor het dr Monet an e baar vo de Impressioniste-Usstellige mitgmacht, wo au Künstler wie dr Pierre-Auguste Renoir oder dr Edgar Degas drbii gsi si, und isch vor allem vom Kunsthändler Paul Durand-Ruel gförderet worde. Im Monet si finanzielli Situazioon isch bis in d 1890er-Joor brekäär bliibe. In dere Zit het er s Konzept vo dr Serii entwicklet, wo s gliiche Motiiv in verschiidene Liechtstimmie zäigt het. Drnääbe het er z Giverny aagfange, si berüemt Garde aazleege, won er denn au as Motiiv in sine Bilder brucht het.